Florencia
Quipohuaj para ipan Tehuacán,
Puebla.
Itztoya se sihuapil tlen quipiyaya icha neca campa tlatzitzica.
Ni sihuapil tlahuel quipaquitayaya xochitini,
pero ax san quina amatiyaya,
mojmostla quihuicayaya se chiquihuitl huan con temoyaya xochitini.
Quema mocuepayaya icalijtic,
ichiqui tlajcotlantoc ica xochitl;
pehuayaya quinmajmaca iteixmatcahua.
Quimacayaya iahuihua huan ihueyinana.
Yonque yajuanti miyac huelta quiijhuijtoyaj ma quicahua nopa xochitini,
pero nopa sihuapil,
ax tlacaquiyaya huan quihuicayaya ichiqui ichtacatzi para quisentilis nopa xochitl.
Hasta nopa xochitini majmahuiyayaj,
pampa san achi quinpolihuiltía se ome tzontli nopa xochitl costic tlen huijtzo.
Yeca mosentilijque xochitini tlen huijtzojque huan moilhuijque quejatza mochihuase queja pilintoque para Florencia ma ax quintequi.
Pero ax cualtixqui,
pampa quema Florencia quiitac para tlapilintoc ni xochitini costic,
mocuepqui huan quitac onca nopa xochitini tlen itoca gerberas hasta nopa tiocuitlaxochitl tlen majmalachtic huan huejhueyi tlen moscaltiyaya ne tlahuejcapanco tlen achi huejca,
pampa ax quicahuiliyayaj ma yohui achi huejca.
Nopa xochitini yejyectzi tlacahuantoya hasta ica huejca petlaniyaya iiixtiyo nopa sihuapil.
Ajachica quiijtohuayaya ”nonana nelía quipaquitas ni xochitini pampa nesi san queja quipajtoque tocalijtic.
Pero quimatiyaya intla yasquía mas huejca quitzacuiltisquíaj,
huan ax quineyayaj ma quiajhuaca.
Nochi xochitini sampa monechicojque huan ni huelta quinotzque se huitzitzili ma quinpalehui,
pampa intla ax onca xochitini yajuanti ax quipiyase tlen tlacuase yon nopa sequinoc pilocuiltzitzitzi ax oncas inintlacualis,
yonse tectli ax momanahuis pampa ax quipiyas tlen quicuas.
Huajca quema tlanqui mocamahuíaj,
nopa huitzitzili motequipachoj,
ax quimatiyaya tlachque quichihuas.
Pero quiitac san sejco tequitij nopa sayolnecme,
moilhui quichihuas se tlamantli tlen quiitac para cuali quisas.
Quin itato sayol nectzitzi huan quinpohuili icuesol,
pero nopa nectzitzi ax hueliyaya quinnechcahuíaj masehualme pampa quinmacasij.
Quiijtojque:
“ Nopa sihuapil huelis techmictis”-,
nopa huitzitzili ax queja nopa mocajqui,
motlali huan quiitato inintlayacanca sapome ma quipalehui.
Quiilhui intla ax quipalehuis,
nimantzi nochi tlamantli tecme polihuisquíaj.
Huan mosentilijque nopa sapome campa mantoc atl huan momatiltijque tlen quinilhuijtoya nopa huitzitzili.
Quema Florencia sampa yajqui nejnemito,
motlalijtoya quitequiti nopa tiocuitlaxochitl tlen huejhueyi huan majmalacachtic ,
nejnenqui campa ax quicahuiliyayaj ma yohui.
Nopa sapome pejque tzicuinij nicanica neca,
nopa sihuapil quiitac tlajquía mojmolinía xihui ijtic,
pero ax quej moilhui huan quejipa nejnentiyajqui huan yonque más chicahuac caquistiyaya quema nejnenqui tlatlajco nopa tiocuitlaxochitl pampa hasta nopano quicahuiliyayaj ma yohui,
campa moquetzayaya tlaxoxohuía nesiyaya,
pero yon yanopa ax quimajmatiyaya.
Ax tlachixqui tlalchi,
ax quinejqui sejcoyoc tlachiyas yon moilhuis quitequis sequinoc tlamantli xochitl tlen nimaj pilini huan quitepehuas huan ax hueli acaj quimaca.
Nochi quipaquitaj nopa huejhueyi tiocuitlaxochitl,
yeca quinequiyaya ajsiti campa tlacahuantoya.
Huan quejipa nejnemiyaya.
Mohualxitlani ica se tlamantli lotoctic,
eliyaya miyac sapome tlen ipan moquetzayaya,
moxitlanijtiyajqui hasta huetzito ipan se tlamantli huan ax eliyaya sacatl.
Eliyayaj miyac sapome tlen quimamajtiyajque nopa sihuapil hasta quihuejca quixtijque ma ax itzto campa Xochitl.
Nopa xochitini tlen cahuantoya queja san tonati quema yejyectzi tlamina.
Quihuicaque nopa sihuapil campa monequiyaya itztos.
Majmahuiyaya,
quimachili lotoctic inincuitlapa,
quintlahuejchihualti ma quicahuaca.
Teipa quiinilhui,
“xinechcahuilica san nijtequiti nijtequis ne tiocuitlaxochitl.
Nopa sapome quimalacachojque huan quema nechca ajsisquíaj campa tlacualca,
nopa sihuapil tlahuejchijqui- ¡Nimechmaca nocamanal,
ayoc quema nijtequis se xochitl intla ayoc innechcuatotonise!
– Nijnequi niyas campa itztoc nonana!
Nopa sapome quimajcajque nopa sihuapil huan ica se tlalochtli,
mosemanque,
ayoc aquiyaya yon se sapo.
Ica tlen ipantic,
Florencia motlalojtejqui icha huan ax motilquetzqui.
Ayoc temacayaya xochitl.
Ipan ichiqui quitenqui iajahuilhua tlen tzotzoltic huan axaca quilhui para tlen ayoc quihuicayaya xochitl calijtic.
Inana moilhui para eliyaya se sihuapil tlen tlalnamiqui pampa quimachili para ax hueli san quej hueli quitequis se xochitl.
Huecatica quema onpaxalohua ihuaya itata ipan iteposcahuayo,
inechca iventana tzicuini se sapo,
san para ma quiilnamiqui para nopa sapome,
quimocuitlahuíaj nopa xochitini.
Nochi tecme huan totome nojquía motlascamatiyayaj ininhuaya nopa sapome,
pampa aman quena,
huelis pajca itztosquíaj ipan nopa yejyectzi xochi mili ica miyac tlamantli xochitini.

AUTORA DEL CUENTO
Isabel Gama

TRADUCCIÓN Y LOCUCIÓN
EN NÁHUATL DE LA HUASTECA
Reyna Alvarado Reyes

CORRECCIÓN Y REVISIÓN
DE ESTILO EN ESPAÑOL
Ytzel Maya

ILUSTRACIÓN Y DISEÑO EDITORIAL
Jessica Mitzy Reyes Juárez

RESPONSABLE DE DISEÑO
DEPARTAMENTO DE DISEÑO MULTIMEDIA
Fernando Ivan Dupotex Herrera

DESARROLLO DE AUDIOLIBROS
DEPARTAMENTO DE DISEÑO DE
MATERIALES DE LENGUAS INDÍGENAS
Luis Flores Martínez

INSTITUTO NACIONAL DE LENGUAS INDÍGENAS

DIRECCIÓN GENERAL
Juan Gregorio Regino

DIRECCIÓN DE POLÍTICAS LINGÜÍSTICAS
Alejandra Arellano Martínez

DIRECCIÓN DE COMUNICACIÓN SOCIAL
Rogelio Hermenegildo García

RESPONSABLE DE LA PUBLICACIÓN
COORDINACIÓN DE DIFUSIÓN
Y ASUNTOS INTERNACIONALES
Gloria Jadra Gutiérrez