Ti kwenchál (ti xe'éts) tam welat ani yab wa'ats a its' u awil ki tsu'uw tekedh yan a ot. Axe'chik a ot ejtilchik a k'icháj, wa'ats axi lej pakdha'chik ani wa'ats axi t'ijax, po patalchik u wa'tsinal k'al i ik' ani k'al i pojodh.
An ik' ani an pojodh in ts'ejkalchik jant'oj ejtil i k'oyej, axé' xi jant'onéy u puwel tekedh, an tam tekedh pulikits, tekedh u ni'nal in ál, u tekedh k'ak'el ani tam u ts'atelchik. Axé' u bijyáb fusiones nucleares.
Axi ok'ox u junkunal jats an ik' axi bijyáb ti hidrógeno, axé' tekedh ik'ow ani tekedh wa'ats ti xe'tsintaláb.
Antsan in tujchal ka wa'tsin ani ka wa'tsin an átomos axi tekedh alchik, ani antsan u wa'tsinal in tajáx a ot.
Tam ka tsemetschik a ot, u petnalchik ani an átomos axi wa'ats tin ál u buk'el al an xe'tsintaláb, axe'chik xi pejach in tolmiyal abal ka wa'tsin a it otchik.
I tsabalil ani pilchik jant'oj axi wa'ats taná', ejtil wawá', ts'ejkan k'al pilchik i átomos axi jiladh k'al pil a ot. Max yabák wa'atsak a ot wawá' yabák u wa'tsinenek ani yabák ne'ets ki konowiy ¿ jant'ini' tu wa'tsinal a ot?