I káwintal in ulal jita' játs ani ma ju'taj u ulel wawá', jant'ini' játs ju'taj wawá' u kw'ajíl, ani in t'ajál abal ku exlalix tam ki buk'uw i káwintal.

Jún i bichow axi in kwa'al yan i kawintaláb, u yanel in jalbíl, nixé' xin jalbíl játs kom ts'ejkadh k'al yan i xe'etsláb axi in kwa'al in kwetém tsalapil ani in kawintal. An kwenchaláb axi in kwa'al pilchik i kawlomej axi in kwa'al in kawintal lubach, tsapik ani yab u tidhebel kin eyendha', u awil ka junkunchik – ejtilchik tam an ts'itsin u ajat junkwenelchik – ani ne'ets kin puwedha' in tsapík abal tin kwetemtal ani abal patal in tsabalil. An kwenchalabchik axi wa'ats ti Labtóm i kwa'al i uchbíl ki eyendha' ani junkudh ki met'a' in pilchik tsalapil i juntal axi in kawnalchik pilchik i kawintaláb.

Abal ki ats'a' ani ki exbay an mulkudh kawintaláb, kwa'al ki eyendha' an wilk'ixtaláb k'al yan i k'aya'taláb, ani alwa' ts'ejkadh, jant'ini' tin yejenchal axé' xi t'ojláb, ani axé' kwa'al ka lej t'ajan ti kwentaj ti al an alimtaláb/ exobintaláb, axi bijidh Física, kwa'al kin dhipa' jún i wilk'idhtaláb axi kin k'ak'na' an puliktaláb xin kwa'al an tének kawintaláb, aniyej axi wat'el tin tonídh an tsabál u met'nal pilk'ij al pilchik an kwenchaláb, ani kwa'al ki beletna' ki uluw alwa' axi in ulal axé' xi exobintaláb.

Antsaná' ti ts'ejkan axé' xi eyendhanél axi a kwa'al xo' ta k'ubak, k'al an junkudh t'ojnal axi k'wajíl ti Labtom Tsabál tin kwentaj an Física, an Junkudh t'ojnal axi in kwentanál an kawintaláb ti Labtom Tsabál, ani an junkudh inikchik ani uxumchik axi in wilk'iyamalchik an dhuchlab axi xowé' a ejtowal ka ajiy.

Al akak i tsakam dhuchlab, i le' abal ki utuw an alimtaláb xi in t'ajamal an Fisica, po ta káwintal ani in káwintal pilchik i junkudh tének, abal ki ejtow ki buk'uw, ki eyendha', ki tsapikmedha' i káwintal.

Axé' xi tsakam dhuchlab ts'ejkadh k'al in t'ojlabil yan i atiklabchik, i ayál abal ka kulbetna' ani ka dheya' a wal ani kit kulbéj junkudh k'al i tsabalil Labtomib, patal i kawintal axi wa'ats ani an exobintaláb xi tu olchamal i mám abal ki buk'uw al pilchik i kwenchaláb.