¿Jant'ini' ne'ets ka ejtow ka utsa' an ja' axi wa'ats ti lejem?¡Kwa'al ka tixk'anchij an at'em! Wa'ats yán i alimtaláb (i exobintaláb) ani i it eyendhanél axi k'al ti ki ejtow ki t'aja'.
Wa'ats i t'ojláb axi olnamej ani ats'at abal tekedh alwa', ejtil axi in pilmedhál an ja' ani an at'em ani in eyendhál an tsapiktaláb axi yab jayk'i' u talél, ejtil in tsapík an k'ak'al.
Max ki punuw an ja' al i pakdha' balixtaláb ani ki punuw nixé' xi pakdha' balixtaláb al jún i tsakam atáj ju'taj ka awits ka otsits in tsapík an k'ak'al (axé' xi atáj u lej eynal abal ka puwedháj an ts'ojólchik axi k'apáb ani an witschik), an tam ne'ets ki ejtow ki t'aja' an t'ojláb axi t'ajnal abal ka ulits an áb.
Tam u lej k'ak'el an k'ij, an ja' u bijk'onal, taliy nixé' xi bijol tam kin taka' in paxk'íl an atáj u wenk'onal juníl ti ja'. Taliy, altáj, al an atáj ¡u ulel an áb!, axé' xi ja' u awil ki eyendha'.
An alimtaláb abal ka awits ka ts'ejkáj jún i alwa' t'ojláb abal ka kaldháj an ja', antsaná' in ne'etsnanchal. Aniyej alwa' ka elan jant'ini' ka kitnáj an ja' ma ti lejem ani ka uldháj ma ju'taj tu yejenchab, po kwa'al jayej ka aliyat jant'ini' yab ka kidhabmedháj an bél. Axé' pel jún i alwa'taláb abal ki tomolna' an yajchiktaláb ju'taj yab wa'ats an ja'.