Yanchik a ot axi i tsu'tal ti kay'lál u awil kin ko'oy i tsabalchik axi k'al ti u toniyáb. Axe'chik xi tsabál walám ejtil an tsabál ju'taj wawá' u k'wajíl, ani walám in ejtowal kin ko'oy i ejataláb.
Pel jún i kulbetaláb ki tsalpay abal wa'ats pil i ejataláb al pil i tsabál ani jaxtám an alimchik in aliyalchik jant'ini' ani ju'taj kin ela'chik pilchik i tsabál tin tonídh pilchik a ot.
Ta its' agosto ti tamub 2016, an alimchik axi in exobnalchik a ot axi t'ojnalchik ti Observatorio Espacial Austral “Met'omtaláb an k'ay'lál Austral” in olna'chik abal wa'ats jún i tsabál ejtilits i tsabalil.
Axé' xi tsabál yab ja' an ok'ox tsabál axi elamej, poj an tsabál axi elan tu kulbedhal kom k'wajat al a ot axi lej utat ti k'ak'al, a ot in bij “Próxima Centauri”.
Tekedh in k'ibál yan i exobintaláb ani i alimtaláb, ani jaxtám yab i ejtowal ki uluw abal an it tsabál axi elan, xi in bij “Próxima Centauri B” in ejtowal kin ko'oy i ejataláb.
Poj i exlál abal in k'ak'ém alwa' abal ka ko'yat i ja'; aniyej exláb abal jún pejách in wal ets'ey in met'ál in otil, jaxtam ets'ey k'icháj al jún pejach ani ets'ej akal al xi júnakej i pejach.