Tekedh owatits elan abal an pakdha' xe'etstaláb (jolataláb) axi k'wajat ti tonídh k'wajat ti jilk'onal tekedh ow ma ju'taj waw u k'wajat, ani max tekedh owchik k'wajat, jayej tekedh adhik u owmél. Antsaná' k'al axé' xi exobintaláb u awil ki uluw abal ti owatits (yan i k'ij owatits) k'wajatakchik tekedh utúx.
Max ki tsu'uw in biyaltal i xe'éts ne'ets ki ejtow ki tsu'uw abal axi wa'ats taná' k'wajinekchik tekedh utúx, jaxtám i tsalpayal abal i xe'éts k'wajinek tekedh junkudh.
Ka tsalpay ka ni'a' jún i ts'en ani ka tsipimedha' ejtil jún i tsakam dhanits, xo' ka tsalpay jayej abal taná' ne'ets ki baliy a k'icháj, i xe'éts ani patal axi wa'ats toniníl, xo' ka walka'.
An tam ka walka' u petnal. Antsaná' wa'tsin i xe'éts. Aniyej an jolataláb ani an k'ij in ko'oy in tujtal al nixe' xi k'icháj (k'ij). Axé' jats xu bijiyab La gran explosión (An pulik petentaláb), axé' jats jant'ini' u tsalpayáb tin kwentaj i xe'éts axi i kwa'al ma ti exobintal.
Axé' xi pulik petentaláb in t'aja' ka wa'tsin an tajaxtaláb, an materia ani patal axi i tsu'tal wa'ats.
An exobintaláb axi in tolmiyal axé' xi tsalpadhtaláb jats abal an k'ak'ém axi u lejbayáb tin lupúdh i xe'tsintalábil, jayetsej axi wa'ats al an k'ay'lál. Jaxtám i ejtowal ki tsalpay abal patal k'wajiy junkalel junkudh.