In totajtol techixnextiya kemej timaseualmej, techsepanyolchikaua uan techmaka se kuali yeknemilis itech in taltikpak.

Itech xolal kampa onkakej miyak tataman tajtolmej moueyichiuaj ika nekuikatilmej uan nochi tamachilis teyin onkak. Itech xolal kampa onkakej miyak tajtolmej mochikaualtiyaj uan kuali mouikaj tokniuan, kanpa yolpakij. Sekosan moyolchikauaj uan kisentiliyaj intalmanik. Itech in Mexico timotalnamiktiyaj iuan okseki tokniuan uan iuan okseki tajtolmej.

Uan ijkon uelis tikakiskej uan tikixmatiskej in tataman tatolmej, moneki maj se tajtolkepa ika kuali uan ika miyak tamachilis. Kachi ok moneki takan se kichiua ika se chipauak tamachilis kemej in Física. Moneki maj se tajtolkepa ika tayekitalis, kemej mouikaj tokniuan akin tajtouaj in maseualtajtolmej. Nochi in talnamikilis maj moyekita uan ijkon maj se kisentili uan maj se kichikaualti iuan in tamatemolmej teyin kichiuaj tokniuan.

Nejin amaix teyin yekintsin tikixpoua, kiyolochoua se sepantekit iniuan ome ueueyi kalnechikolmej Sociedad Mexicana de Física, Instituto Nacional de Lenguas Indígenas uan no ijkon teuantikej nejin momachtiyanij itech in kalnemachtiloyan Universidad Intercultural del Estado de Puebla.

Ika nejin chikuasen takuilolmej tikixnextiyaj tataman tamatsintokalis teyin monejnemiltijtok iniuan uejueyi tamatinij teyin kintokaytiyaj físicos uan ijkon tiktapouaj se yankuik tamatilis kampa timaseualmej tikmati toni mochiujtok itech oksekin xolamej.

In amaix kinechikoua se olochtekit ininuan miyakej tokijniuan, tikchiyaj ika xiksepantatekiujtikan uan no ijkon tiknekiskiya ximomachilikan ika pakilis ipan in taltikpak kampa tinemij, kampa tixnesi miyak timaseualmej.