Onkak miyak tauil teyin toixtololouan amo kitaj. Kemej, in kouamej teyin kuali kitaj tokauanyoj uan nekmej kuali kitaj nochin tapalmej teyin kipia se xochit.
In tepos teyin monotsa horno de microondas, teyin ika se tatotonia, kitekitiltiya se tauil teyin amo ueli tikitaj, nejin monotsa microondas no ijkon in celulares uan teposejekatanojnotsalonimej kitekitiltiyaj in tauil teyin amo ueli tikitaj. Itech kaltapajtiloyanimej semi motekitiltiya nejin tauil teyin amo ueli se kita, Kemej in rayos X teyin ika kikixtiliyaj ixtakopimej in tojomiuan.
Nochin tauilmej, teyin ueli se kita kemej itapaluan kosantsin uan teyin amo ueli sekita kemej rayos X oso microondas, kintokaytiyaj ueyichikaujkameyot “radiación electromagnética”. Ininchikaujkayo kintamanchiuaj. In, rayos X kipiyaj kachi miyak chikaualis teyin ueli moitaj, uan microondas kipiyaj kachi tepitsin miyak chikaualis kej rayos X uan nejin microondas kipiyaj kachi tsiktsin chikaualis teyin mokui itech in teposejekatanojnotsaloni.