Miyakej sitalimej teyin tikinitaj itech iluikak uelis kipiyaskej oksekin kemej taltikpak teyin no kinyeualouaj. Sekimej uelis chijchiujtoskej kemej totaltikpak uan ueli onkas nemilis! Uelis moajsis nemilis itech oksekin taltikpakmej semi teyoltanemililtiya, yejua ika miyakej tokniuan tamatemouaj keniuj uan kani uelis moajsiskej ne oksekin taltikpakmej itech neje sitalimej.
Itech in metsti agosto xiuit 2016 iluikataixpejpenanij teyin pouij itech in nechikol Observatorio Espacial Austral, kiteyixnextiltijkej ke itech in semanauak onkak okse taltikpak teyin ijkuitik nejin totalmanik,
maski amo yekinika yejua moajsi, nejin tajtol moneki maj sekimati, ta ne okse taltikpak no kiyeualoua okse tonal: Próxima Centauri teyin kinetechojtok ne tonal teyin nochipa tikitaj.
Ika nijin tamatemolis tetaliya itech se tanojnotsalis kampa moixyejyekoua keniuj uelis se yas sitalkopa.
Miyakej tamatemolmej poliuij ok uan ayamo ueli moijtos ke nejin okse taltikpak teyin moajsik kipiya nemilis (Próxima Centauri B). Ika oksekin taman tanemililmej, ta maski ikauanyo yeskiya kuali maj onka at, neje okse taltikpak nochipa onkeptok ixpan neje okse tonal. Nejon kijtosneki ke tajko nochipa tonatok uan okse tajko nochipa tayouatok.