Xiujmej tayikan moajsik ke ne mixkouamej teyin monotsaj galaxias techkaujteuaj uan ne teyin kachi uejka moajsij kachi ijsiujka mouekatiliya. Ika nijin ueli moijtoua ke achtopa, kachi netechiujtoyaj in semanauak.
Ta ijkuak tikitaj kachi teyin panok ya itech in Semauak, kachi netechiujtokej nochi teyin onkak itech, yej ika se kinemiliya ke achtopa nochi in Semanauak tel senka olochyetoya.
Maj sekinemili ke tiktsikitsintiliya se tepet kemej se askat, uelis no se kinemilis ke tayijtik tikalakiyaj ne tonal, nochi ne mixti uan ne mixkouamej; axkan maj se kikajkaua. Maj se kinemili ke nochi toponi ijkuak se kikajkaua.
Ijkon mochiuj Tosemanauak; no ijkon ne tonalmej uan nochi in tayojkanyot mochiujtiuetskej. Nijin monotsa “Ueyi Tatoponilis”, yejua nijin ika se kinextiya itech ne tamatemolis. Ika nijin tatoponilis kipeualtij nochi teyin axkan onkak, ne tit uan nochi teyin axkan tikitaj.