Juchari éskuechaksï no yámintu járhati t’íntskuechani exeasïnti. Akuitsichaksï úsïnti exeni jorhepikua enkaksï yámintu ampecha uérhikuarhijka ka wawapuechaksï exeawasïnti tsïpataecharhu mámaru járhati atakuaechani, mánkachi k’uiripuecha no úk’a exeani.
Hornos de microondas arhikataecha, jorheratarantskua ampe, marhuatasïnti ma jásï t’íntskua, enkat’uksï jucha no úk’a exeni, microondas arhikataecha ka uantap’etarakuecha celulares arhikataecha jamperi, ka wantakua etsakutarakuechaksï marhuatasïnti t’íntskua énka no exekuarhik’a. Tsinap’ekua k’umanchikuaecharhu úranasïnti máteru jásï t’íntskuecha mánka no xarharak’a, éska rayos X arhikataecha énkaksï jimpo p’itanarhikuak’a únichani.
Iámintu t’íntskua, énka xarharak’a esïka xupakataeri atakuaecha ka mánka no xarharak'a éska rayos X ka microondas arhikataecha, arhinasïnti radiación electromagnética. Mánka xarhatak’a náki t’íntskuaeski jorhepitaesti. Rayos X sánteruksï jorhepisti éska t’íntskua mánka xarharak’a, ka i t’íntskua enka xarharak’a sánteru jorhepisti éska microonda ka microondas sánteruksï jorhepisti éska énka marhuatanak’a wantakua etsakutarakuarhu.
Jiéni wératini enkaksï mítika éska radiación electromagnética marhuasïnka újuani manakuarhirichani, ésïka exenarhikukua, uantakua etsakutarakua, uantap’etarakuaecha, radiografías arhikataecha, ka cáncer arhikata p’amenchakua jamperi tsinakuarhpeni.