Wánikwaksï jóskwecha énkachi awantarhu exek’a nántikaksï jatsikwarika parakpinichani énkaksï wanotani jaka. Nántikaksï márhu aricha xáraka éska juchari tata jurhiata, ka nántika, ¡tsípekwa jamperi jaka! Ísku jánhaskaparini éska jaka tsípikwa juchari parakpenirhu wérakwa jimpo, kánikwa tsípekwa másti, ka ísï jimpoksï wánikwa k’érati jirinhasticha jirinhantasïntiksï néna ka nani exentawa parakpinichani materu jóskwecharhu.
Jinte kutsï Agostu, yúmu irepita ka témpeni kuímu wéxurini jimpo, jorhentaticha énka parakpini wérakwa anapu ampe exenka Observatorio Espacial Austral anapuecha, wantanhasti éska jarhaska parhakpini jucharini jásï ma, nák’irhu no ima wénaka exenhantani,
arhi wantakwa kánikwa wétarisïnti mítini jimpoka ima parakpini wanotaxati jóskwani énka sánterhu antaritini jaka juchari tata jurhiatani: Próxima Centauri arhikata. Ísï jimpo wantanhaxati, nántikanha wuáka niárhanhani parhakpenirhu wérakwa (jóskwecharhu).
Kánikwa ampe jarhasti pári jirhinhantani ka nóchi wuáka wantani eska ima parhakpinirhu énka xenhantaka (Próxima Centauri B arhikata) jarhaska tsípekwa, jimpoka, nák’iru jaka jimani jásï aparikurita enka jiáratka éska jataka itsï itsïni jásï, ima parhakpini ménku isï mák’u erhanhakwani jarhasïnti imari jóskwani, arhisïntikini, éska teruk’ani jamperi énka xáni jinteka ménku ísï juriakwasïnti ka máterhu teruk’ani ménku ísï chúrikwasïnti.