Yóntki ísï wératini mítinasti eskaksï K’éri Auantarhu galaxia arhikatechats’ïni jarharenixati ka éska na sánteru yawani jawaka, sánteruts’ïni sóntku jarharisïnti. Ísï jásï exeparini wákasï wantani éska yóntki yóntki ísï sánteruksï kúnkuarhitinixapka.
Jimpo énkaksï sánteru yóntki anapu ampe exeaka juchari K’éri Awantarhu sánteruksï no yawani jarhankutinixapti yámintu ampe énka jimesï jaka, jimpoksïsï eratsikak’a éska méni ísï iámintu Juchari Awanta márku katsinitikuarhinixapka.
Eranaska je éska juáta ma sïrukini jáxentapirinka xáni puchakuarhini ka wákats’ï, éska jima inchanapirinka Tata Jurhiatani, Vía Láctea arhikatani ka iámintu galaxia arhikataechani; yásï jurak’wa je. Jánaska je éska yámintu ampe charasïnka. Íni charakua jimposï kueraanati juchari K’éri Awanta.
I charakuasï arhikuarhit’i “K’éri Charakua”, íni charakua jimposï eratsinati éska kueraanaska K’éri Awanta. I k’éri charakua kueraasti t’íntskua ka yámintu ampe enkaksï yásï exek’a iásï.
Ma ampe enka jarhoak’a i xásï eratsikuani, imaesti énkaksï ts’éritak’a jorhepikua yawani k’éri awantarhu ísï yápuru ísï mák’ueni tsásïnti nani wék’i ísï enkaksï awantarhu eranchiaka. Ísï jimpo eratsisïnkaksï eska méni ísï iámintu ampe p’ikurhitinixapka.