Mápu arí ke néwaré mechá ko, ni biré noréa wirí, kawichí jónisa ta á uméro wiká seporí e’néa. Na seporí ko jarécho rayénari jú, jaré ko wé’rí, jaré cho kuuchi, narí be suwába bujaní bemoríririchi a’rí napisóchi jónisa.
Jepuná namúti ko á nakúro kíti kuchi kíto kabórame kayenáma, a’rí ko minábi wé’ri ochérosima. Échi jónisa ko né wabé rachísimi pachánara nasípa atíame, wa’rú berá kayenásimi. Chikisáa ko, échi partículas aneríame ko we ratabára, mápu arí je ikí ko, suwábaka namúti napawíra kíti ko we ratabára, a’rí échi kítera na’í newá. Mápu arí je reká ikí ko ta fusión nuclear ané. Mápu bachá a’é ko hidrógeno aneríame jú. Na namúti ko ke me betéame jú suwába namúti kítera a’rí ko suumá kawichí, rewegáchi ma nirú. Je reká berá chóta kayénaa biré seporí o rayénari ko ba.
Biré seporí mukúachi ko, échi átomo aneríame ko, mápu pachánara kayénare, suumá rewegáchi berá chijáni ba, nikuúra jéreká mápu jarécho seporí kayenáma.
Átomos jaréana cho seporíririchi kayéname ko, á berá nikúrore kíti kayenáma na kawí mápu oná ta muchúwi. Jépuná átomo ko, á nikúrore cho mápu kíti tamó abói repokára ayéna cho chikó reká cho kayénama. Ke nirúrisa ko seporí, ke wési ta mochíbire jénaí kawichí, ke tási ta natábire ¿chú reká kayéna biré seporí ko?