Nanotecnología ko jú mápu arí kúchi kíto namúti newaría, na namúti ko berá ta ke retewá pe je iriká ko, narí be mikroskópioti ko ta á riwibóa. Mápu arí je uchúpi jú ko nanométrica anería. Kíti ta mo’ába chu uchúpi jú na namúti ko, biré ta sikúi á riwiméa biré karisí mápu riká tamó ko a retewá na kawí mápu oná ta muchúwi.
Jepuná kuchi kíto namúti ko, né wabé kuúchi berá jú ba. Pe jarépi bi molécula a’rí átomo náti newárame jú. Ma berá á natáiru mápu na kuchi namúti naurí sayérame niíma, échi kíti berá newaría nano-robots aneríame, kíti á sayéroma sélula cáncer nayúame.
Ma berá á nocháriwa je reká ko ba. Jaré chikúri cáncer nayúame yúa nocháiru. Jaré berá molécula napabúiru, na kúchi namúti ko nócha mápu riká biré nano-robot naurí sayéroka.
Pachaána berá chikúrichi mo’áiru jepuná nano-robot, a’rí ko á rewáre ajaré sélula cáncer nayúame. Je reká benésa ko, rarámuri a’rí mukí yúa nocháma aré ko.