Ariká wé a’rá machíachi ko, tamó busíra ko wiká namúti ke retewá. Jaré namúti jaákame ko, mápu riká sinói á uméro ratarí e’néa tamó repokárachi nirúame. Se’orí akáame ko, á retewá semátarichi, jaré namúti mápu tamujé ko ke tási uméro e’néa.
Horno de microondas aneríame ko, mápu a’rí ko’wáame, ba’wí ma ratabáchi, ta mi na’íti néwaré kíti we a’rá ratabáma na namúti, na na’í ko ta ke retewá cho. Na na’í ko microondas anería. Suwábaka selulári a’rí rário sí je iyíri na’í néwaré kíti a’rá anémaa. Mápu oná ónawa, ayéna cho we néwarería je iyíri na’í, rayos X berá anería ba. Na na’í ko, tamó ochirá e’néame ju, narí ke tási tamó okótika.
Korimí mápu tamujé isíni retewá, rayos X aneríame ma, radiación electromagnética rewaráiru, narí be korimí a’rí rayos X chópi yíri jú ba, narí biré ko obé jiwérame ju; rayos X ko obé wikaná simírame jú mápu riká tamó sa’párachi, échi kíti berá tamó o’chirá néwaré ba, kíti ko na na’í ko ke tási uméro simíraa tamó o’chiráchi. Mápu arí ta ko’waáme ratabáchi ke napíchi manaká ko, mikroóndachi narí, jépuná ko o’bé jiwérame berá jú ba, échi kíti berá ratabáchi échi ko’wáame, ba’wí ma ba.
Ma a’rá machisá ko, chú yíri jú a’rí chú riká nócha radiación electromagnética aneríame, chijónisa berá newáiru kabisióni, rário, ra’ichaára selulári aneríame, rayos X tamó o’chirá e’néame ma, kíti ko na suwábaka namúti ta mi na’íti náti a’rá nócha. Ayéna cho newáiru jaré namúti mápu naurí cáncer sayéroame níima.