¿Chú riká ta omérosa re ba’wí márchi maníame bajía? ¡Koná éka ra! Á berá wé machiwá chú riká ésa re koná na ba’wí ba. Jaré machíame ko, ayéna berá aní mápu ratarí rayénari nijíame ko wé ka’rabéara jú, kiti ko ke namúti suwáa, na’íi iyíri, kú iyíri.
Ba’wí márchi maníame támbochi ro’ásiwa, a’rí na támbo ko pachá inbernadérochi manásiwa chó, á berá ikí mápu reká norí kayéna a’rí ko ku ukú. Ba’wí ko bemorí kayéna mápu arí rayénari ratabáchi, ná bemorí ko úlechi inbernadérochi nirúame chukúa chécho ba’wí ku najítika. Chijónisa ko ku pachúra. Na ba’wí ko ma ku a’rá jú bajíara.
Minábi á beneríwa chú riká narí a’rá jú kíti ba’wí márchi maníame rarámuri a’rí umukí á uméroma bajía. Ayéna cho machináriwa chú riká orába kíti na ba’wí we akaáme, tobóa mápu oná néwareríwa ke biré namúti cháti nachútika. Je reká orásiwa ko, á berá ke me risóa nírima aré ajaré rarámuri ba’wí kuwímia ba.