Wiká seporí mápu ta re’pá rewegáchi retewá ko, á ní’wi jaré pilanéta aneríame mápu chimí norérika ujúma. Jaré pilanéta ko, mápu yíri tamó kawíwara ke re, ayéna cho á ní’wi aré namúti jaákame. Mápu re ta namúti jaákame riwisaá jaréana cho kawichí re’pá rewegáchi muchúwame, ne a’rá niíma.
Échi kíti berá, échi científicos anéríame wé á benéra chú riká, kúmi muchúwi o újuma pilanéta aneríame kípu rayénara norérika.
Chabé agosto mechá, bamíbari ko okuá míli aminá makói usáni inárachi, échi namúti rewegáchi nirúame e’néame, astrónomo aneríame, á berá aníri mápu nirú biré kawí né mápu iyíri tamó kawíwara cho.
Ke berá bacháwara riwirúame jú ba, narí be ayéna wé natéame jú jépuná ra’íchari ko kíti ko ta á ikii mápu á norérika úma kípu rayénara. Na kawí Próxima Centauri B aneríame ko, binói rayénara norérika úma, na rayénari ko rewé Próxima Centauri.Na rayénari ko né muribé atí tamó rayénaarachi.
A berá wiká namúti che nirú mápu benébaa ko ba, narí be ke tási cho bichíwisa re mápu échi birécho kawí riwirúame Próxima Centauri B rewéame, namúti jákame ní’wi. Narí be ayéna á machiwá mápu ratarí choná nirúame ko, ayéna á nikúroma kíti ba’wí nirúrima. Ayéna cho ta á machí mápu na kawíririchi ko, sinibísi á rayéna biréana, a’rí biréana cho ko, rokoó ju. Échi kítera berá, mápu yíri tamó kawíwara jú ba.