Biré galaxia ko jú mápu oná wiká seporí muchúwi ajarécho kawí má omaána nirúame. Kiyá ko, á machiíru mápu na galaxia aneríame, sinibí rawé obé mekabé siméa a’rí ko we sapúka; mápu mekabé muchúwi ko wé sapúka siméa, a’rí mápu murípi muchúwi ko pe obé kiriípi neraá.
Je reká berá ta ikií mápu kiyá ko, galaxia wé napawíka mochíre. Jépuná suwábaka namúti rewegáchi muchúwaame ko, obé napawíka mochíre chabé kiyá ko. Échi kíti berá ta aní mápu suwábaka namúti rewegáchi muchúwaame, ne wabé rachía mochíré siné kaáchi.
Mápu ta na’í aní ko jú, mápu rikámiti wa’rú bo’ásika wé rachinásiwa mápu uchurú ta sikúi kayéna, ayéna cho échi oná mo’ába rayénari a’rí suwábaka namúti rewegáchi nirúame, chijónisa ko niyúsipa. Bo’ásíka ko wa’rú ku kayénama. Je reká berá kayénare suwábaka namúti rewegáchi nirúame ajarécho namúti mápu ta ke retewá ma.
Jé reká ikíachi ko ta rewará, “we’ré chijaáchi”. Jé reká berá machiwá siénsiachi ko ba. Je reká ikisaá ko, á berá kayénare suwábaka namúti mápu ta kawichí retewá a’rí rewegáchi sí nirúame.
Ratarí, rurawí ma ta anáwisa re’pá rewegáchi nirúame ko, suumá berá chiyéna chópi reká jú. Obé miká ko pe chiyéna cho á ratá ruraké re má. Je reká berá ta machí mápu siné rikáachi, suwáka namúti we napawíka mochíré.