Ma’n jix uañ tuka’, gio na cham jix masba’ka’, nammu dɨr gampɨx jix bhai’ nach ja tɨgia’ mui’ gu juju’ba’ jix dham. Dhi’ dhi juju’ba’ jir puchu’m am na jax gu tanolh, jai’ io’m gɇ’gɇr gio jai’ io’m ɨ’lhich, dai na gu’ bɨx jup jum bua am gu kubhɨx ga’n ki’n gu gas gio gu polvo.
Dhi’ ba’ kɨ’n mui’ ji chum ka’kbulhka’da’, gu ka’kbulhik am ba’ salh mui’ ji gɨ’lhia, mi’ ba’ nam io’m bar gɇ’gɇrka' gio na jix io’m bax o’ka’ gui’ na tu’ map jumpax ka’ gu ɨrbanga’n, gui'na pui' tɨ’ partículas jix io'm jam toiñdhia’, na ba’p tum duñia’ pui’ tɨgim fusiones nucleares.
Gu hidrógeno bɨpɨ’ map ma'n jup jum duñia', na gu’ dhi’ jix io’m jix jabok gio na gɇ' jai'ch na jɨ’x jix chu bhai’; pu’ñi ja’k ba’ mui’p jim duñia’ am mapda'ñxim / bhɨichdhixim mui’ jim dagia’ am ɨ’lhich dhɨr mɨkkat io’m jix bɨpɨt gio dhi’ba’ kɨ’n jup jum bua am gu totbik ga’n gu juju’ba’.
Nam pai’ dhuk koi’ya’, gu juju’ba’ xixpun am gio gu ɨ’lhich nam kɨ’n ɨrbandɨr jup duñix mɨk jap pu sulhgia’ am na jɨ’x jix chu bhai’, pu’ñi ja’k ba’ tu palhbuiñ am nam ba’ jup jum duñia’ jai’ gu juju’ba’. Gu ɨ’lhich, bimñiga'n mui’ jai’ gu juju’ba’ ai mɨt na mɨt jup duu dhich oi’ñga’ntuk gio bɨx na tu’ ya’ jix chu jai’ch, bɨnkam ach. No’ gɨt cham gu juju’ba’, ap gio añ chamtu’ ya’ jich chɨtɨkka’nda’ ich gɨt ¿Jax ja’k jup jum bua am gu juju’ba’?