Gu ñi’ok jich bhan jix maatɨ’, dhi’ pui’ ja’k tu bua na ba’ maxik jix jai’chka’ guch oi’ñgan’tuk, gio ba’ na dhi’ jich palhbi’ñ nach ba’ jix maatɨ’ka’ nach jir jaroi’ jich ñi’ok kɨ’n.

Ma’n gɇ’ pue’mlo na mui’ ñi’ok jai’ch dhi’ bhan jir jix chumñigan gu mui’ gu ñi’ok gio gu a’oi’gan na mi’ jai’ch, na gu ma’n kiicham na mui’ tu jai’ch jix o’ju’ka’ gu ñi’ok, jix kɨɨkɨ’ gio no’m gɇ’kam jix bhai’m taat, jix bhai’ na gɇ’ gio jix o’ jap duñia’ jaxchu’m ma’nkam gio ba’ bɨx na jɨ’x jir pue’mlo. Gu pue’mlos Mejik kam jix bhai’ nach jix bhai’ jich chatka’ na gu jix bhai’ nach tu a’gada’ mui’ dai a’oi’ñga’n nach gu ya’ tu kio na pai’ mui’ jai’ch gu ñi’ok.

Nach ba’ jich kɇɇka’ gio nach jix maatit jich kɇɇka’ ya’ dhi mui’ ñi’ok, jir am ba’ nach jix bhai’ mui’ pui’ xi buada’ gui’ nach tu traducirda’ gio ba’ joidham na jax ba merecer dhi’ na pui’ ja’k tum bua, jix io’m ya’ na pai’ gu maatda’ mim a’gada’, pui’ na jax gu Física, jum a’ na tum traduciru’ xim respetardat nar jax ja’k tu’m gu ñi’ok, nam jax ja’k jix chu maat mi’jap dhi pue’mlos gu tu’ na ya’ tu jai’ch oi’ñga’n, gio ba’ nam xi ñɨɨdhat up na jir pui’ka’ na jax a’nda’ gu matda’.

Pui’ñi ja’k ba’ nat ba’p jum duu dhi’ñi u’uan nap mi’ jum noonob am daa’, dhi’ mi’dhir bus na mɨt jix maatɨt map jim daagɨk tu jua gu Sociedad Mexicana Física kam, gu Instituto Nacional de Lenguas Indígenas gio ba’ gu bipibup traducirdam na mɨt mi’p duu na tu’ mi chu ua’ñix nap ya’ xi jiñkuidha’ u’uanta’m.

Ji xum ma’n bhan gu ɨ’lhich ñi’ok ach mia’n jix aichdham gui’ na Física mim a’gada’ mui’ gu ñi’ok kɨ’n nach bhan pui’ ja’k jix a’, nach map xi chu a’gada’ gu maatda’, jabɨm gu pue’mlos ya’ kam Mejik na ba’ bhan alhi’ch mui’ xi palhbidha’ gu ja derechos ja ñi’ok bhan nam bia’ bɨx nam jɨ’k jir o’dam gio ba’ na bhan jix o’ju’ ka’ gu ñi’ok ya’ kam Mejik.

Dhi’ñi dhi alhi’ch u’uan bhan jup tu’i’ gu ja juan mui’ gu ja’tkam, nɨɨra ich nap joidham xi kaiya’ gio nap kɨ’n joidham xim tatka’ jich pue’mlo’ kɨ’n, gu ñi’ok na ya’ jup tu’i’ gio ba’ gu maatda’ na jir am nach xich mamkada’ dai pue’mlos.