Mui’ gu juju’ba’ nach bhai’ ja nɨɨ’ñ jix dham ja bia’ am jai’ gu a’oi’ñga’n nam ja bhi’mñidhidha’. Jɨ’k chi’ pui’p tu’m am na jax dhi oi'ñga'n nach ach bhan tu kio piam ku pui’ bhai’p jai’ch i’mda’. Na jɨ’x jix bhai’ nach chɨgia’ i’mda’ dɨrapdir na pai’ dhich oi’ñga’n jir joidham dhu,
pui’ nam ba’ gux chu mamatkam tu ga’nga nam jax ja’k gio nam pai’ chɨgia’ jai’ up gu a’oi’ga’n nam xikolh dharka’ bhan gu juju’ba’.
Jano’ agostuta’m 2016 oidha’ bhan, gui nam juju’ba’ ja mamtɨ bhammmɨ kam Observatorio Espacial Austral, jup kai’ch am na jai’ch ma’n gu oi’ñga’n na pui’p tu’m na jax dhir ach.
Sia chi dhi’ cham bɨpɨ’ tɨɨ mɨt na pui’ñip tu’mka’, kugu' dhi’ na mɨt tɨɨ io’m jir joidham na gu pui’ xikolh up jim na pai’ gu ju’ba’ na mia’ daa na pai’ tanolh: Próxima Centauri.
Bɨxchu’ ka tu paltar nach chu machia’ chakui jir am ba’ nam pui’ chɨɨya’ na gu oi’ñga’n na mɨt tɨɨ, pui’ chɨgim Próxima Centauri b, bha jai’ch i’mda.
Xib ba’ dai, jix mat ich sap na jɨ’x jix juk jir am pa’ na ba’ jai’ch ka’ gu sudai’; sia jix mat ich na chi ma’n na jax chu’m mu nɨi’ñchu’n ka’ gu buibsa’n gu ju’ba’ga’n, pui’ na ba’ taak dɨr bhai’ na jɨ’x jix bhai’ gammɨjɨ jix chu max ka’ ja’p dɨr gu taakga’n gammɨjɨ jir tuka’ ka’.