Bajɨk mui’ oidha’ ba jur sap mat amit na gu juju’ba’ mui’ jimdam ya’ nach pai’p tu’i’ na jɨ’x jix chu bhai’, pɨx mɨk ji jimim am gio nam pai’ dhuk io’m mɨk ba jim io’m xi’ ba jimida’ am. Dhi’ ba’ kɨ’n nax chu maatɨ’ na ba’ pui’ ja’k ji bussak, na bajɨk pai’ dhuk, jix io’m mi’mia’n darkat am. Pui’ dhukat ba’, no’ch mui’ xi chɨnɨi’ñ na jax chu tui’kat bajɨk na jɨ’x jix chu bhai’, más io’m mi’mia’n jup tu’i’ kat am bɨx na tu’ ya’ jix chu jai’ch, dhi’ ba’ kɨ’n pui’ ɨlhi’ñ ich, na bajɨk pai’ dhuk, bɨx gui’ na jɨ’x jix chu bhai’ map tum jumpax kat.
Pui’ pim xim aaga’ nach map moi'spa', kabkada' ma’n gu oidha’ na ja’xbui’ bi’ya’ na jɨ’x gu arampo, piam io’m, pui’p xim aaga' nach bɨx mi baasa’ gu tañolh, nach pai’ jup tu’i’ gio bɨx gu juju’ba’ mui’ jimdam; xi ja do’ñcho’ ich ba’. Pui’ pim xim aga’ na pu tum xipñia’ nach pai’ dhuk ja do’ñcho’. Pu’ñi’ ja’k jup tum duu na jɨ’x jix chu bhai’ nach pai’ oi’dha’; bɨx na jɨ’x jix chu bhai’ gio gu tiempo jup jum duu mɨt jano’.
Dhi’ ba’ pui’m tɨ’tɨ’ “Nat gɇ’ tum xip”, jir nam jax ja'k gu ciencia ɨlhi'ñ nat tum duu dhi’ ya’ na jɨ'x jix chu bhai’. Dhi’ nat gɇ’ tum xip dɨr jup tum duu gui’ na kɨ’n jix chu max, na tu kɨ’n jup tu duñix gio bɨx na tu’ jix chu jai’ch nach tɨnɨi’ñ.
Ma’n gui’ na mattudhix na sissap dhi’ na jax jak tɨm ɨlhi’ñ jir na sap gu temperatura nam jupa’ba’n muja’p mɨk na jɨ’x jix chu bhai’, dɨrap dɨr dhi oi'ñga'n gu tumaxiñ io’m bajikkam na jix bhai’ nach tɨgia’, jir dhi’ pɨx up sia nach pai’ ja’k tɨnɨnɨi’ñdha’ jix dham. Dhi’ ba’ kɨ’n pui’ bach aich na bajɨk pai’ dhuk bɨx map tum da'nkat, map tu jumpax kat.