Wa jach éek'joch'e'en tu'ux yanech yéetel wa mix u juul maamaj uj yane' je'el u páajtal a wilik u piktáanil le eek'o'ob ku p'ip'iláankilo'ob te' yóok' ka'ano'. Le eek'o'ob ka wilika' bey je'ex le k'iino', yaan u jach nuuktakil yaan u mejentakil xan, ba'ale' láayli' ti' poolbo yéetel gaas u taalo'obe.
Le ba'alo'oba' ku xa'ak'ankubáajo'ob tak kéen káajak u sen nojochtal yéetel u chichtal u mu'uk'a'antikubáaj u ts'u', lekéen jach chokojchajake' ku yúuchul le ba'ax k'aj óolta'an bey fusyoones nuklyaareso'. Le yáax ba'ax ku xa'ak'a'antikubáajo' leti' le hidroogenoo', u maas sáalil xan yéetel u ya'abil te' Yóok' ka'ano'; bey túun u káajal u sinlenpáayil le aatomos ku bin u sen altalo'ob tak kéen tóop'ok le eek' yéetel u sáasililo'.
Lekéen xu'uluk u jojopáankil le eek'o'obo' ku wáak'alo'ob. Le aatomos yano'ob tu ts'u a'achilo' ku láaj t'i'it'pajal te' galaaksyajo'. Tuláakal u xiixele' ku yáantik uti'al ka yanak uláak' eek'o'ob.
Le aatomos yáax t'i'it'paja'an úuchilako' chúukpaj uti'al u meentiko'ob u yaantal way Yóok'ol kaabe', tuláakal ba'ax yaan ichil, bey xan u yaantal u wíinikililo'ob. Wa ma' úuchik u tóop'ol le eek'o'obo', bejla'ak mina'ano'on wal in chéen k'áat in wu'uyo'on bix úuchik u láaj tóop'olo'obe'.