Te' siiglo jmáano', ojéelta'ab u galaaksyaj Yóok' ka'ane' ku náachtal ti' to'on, ba'ale' kéen jo'op' u bin u náachtalo'obe' maas séeb u bino'ob. Yéetel le ba'ax ojéelta'aba' je'el u páajtal u ya'ala'al úuchile' te' Yóok' ka'ano' tuláakal ba'alo'ob maas naats'tak. La'aten kin tukliko'one', úuchile', tuláakal ba'alo'ob yaan te' Yóok' ka'ano' bey wóolk'abta'ano'obe'.
Ko'ox a'alik kin wóolk'abtiko'on jump'éel bu'utun tak kéen náakak buka'aj u wíinkilal juntúul chan síinik, ichile' kin chok'iko'on le K'iino', le Biiyaj Laaktyajo', yéetel tuláakal le galaaksyajo'obo'. Wa ka a chan jeb a k'abe' xíik jóok'ol ken u meento'ob. Bey túun úuchik u tóop'ol le Yóok'ol kaabo', yéetel u káajal le ba'ax ku p'i'isil bey tyeempoj yéetel espaasyojo'.
Ba'ax úucha' k'aj óolta'an je'ex le “Graan eksplosyoono'”, lela' u na'atil bix úuch u xíik tóop'ol Yook' ka'an. Tumen ka jxiik le ba'alo'ob u wóolk'abtmajubáajo'obo' tu meentaj u yaantal le ba'ax kin wiliko'ono', u juul le sáasilo' yéetel le ba'axo'ob ma'atech xan kin wiliko'ono'.
Uláak' ba'ax meetik u tukla'al bey úuchik u yúuchulo' leti' lekéen pakta'ak, yéet u nu'ukulil, u sayabil le Yóok' ka'ano'. Tumen je'etu'ux ka a sut a paakat yéet nu'ukulo' chéen jáanil yéetel sáasil a wilik. La'aten túun ku tukla'al ka'ach úuchile' tuláakal ba'al u yiknalmajubáajo'ob.