Ya'ab le eek'o'ob kin wiliko'on te' ka'ano' ma' chéen tu juunal yaniko'obi', je'el u páajtal wa yaan wóolkabo'ob ku suuto'ob tu paache'. Yaan jach beyo'ob way yóok' kabila', ku tukla'al xan yaan ba'alo'ob kuxa'ano'obi'. Bix wáaj túun jach utsil yéetel sajbe'entsil ka yanak kuxtal ti' táanxel wóolkabilo'ob.
La'aten ya'ab ajxooko'ob táan u yilik u na'atiko'ob bix yéetel tu'ux u kaxtiko'ob wóolkabilo'ob ku suuto'ob te' táanxel eek'o'obo'.
Agostojeak ti' 2016e', u astronomosil le Obserbatoryoj Espasyal Awstralo', tu ts'áajo'ob ojéeltbil yaan uláak' wóolkabil k'as bey bin way yóok' kabila'.
Ma' yáaxili' u yojéelta'al u páajtal wa yaan uláak' wóolkabil beya', ba'ax jach meentik u tsikbalta'ale' tumen jach naats' yanik ti' jump'éel eek' naats' te' k'iino'. Le eek'a' Próxima Centauri u k'aaba'.
Jach ya'abkach ba'alo'ob yaan ti' meyaj xokbil yéetel ti' na'atbil. Tak bejla'e' ma' béeylak u ya'ala'al wa jach jaaj yaan ba'alo'ob kuxa'antak te' wóolkabil Próxima Centauri B kaxta'abo'.
Chéen ba'ax ojéelta'ane' je'el u páajtal bin u yaantal ja'i'. Uláak' ba'ax ojéelta'an xane', juntséel u yiche' maantats' tun pakta'al tumen le eek' tu'ux ku suuto'. Bey túuna', juntséel u yiche' maantats' sáasil, uláak' jumbúuje' maantats' éek'joch'e'en.