Yaan u juul ba'alo'ob ma' chíika'an tu yich mixmáaki', ba'ale' yaan ba'alche'ob je'el u tsa'ayal u yilo'obe'. Je'ex le kaano' je'el u páajtal u yilik bix u juul u yooxol u wíinkilal máake', kaabo'ob xane' je'el u páajtal u yiliko'ob boonilo'ob ma' tu tsa'ayal ilbil tumen wíiniko'obe'.
Yaan xan uláak' juulo'ob mix chíika'an in wiliko'oni'. Uti'al u k'íinkuunsa'al janal ti' oornojil mikroondase' ku k'a'abettal jump'éel juul u k'aaba' mikroonda. Celulaar yéetel raadyo xane' ku meyajo'ob yéetel uláak' juulo'ob, ma'atech u páajtal u yila'al. Te' kúuchil ts'aakankil, bey xano', suuk u yúuchul meyaj yéetel xma' chíika'an juulo'ob uti'al u chíikbesa'al u yoochel baakelo'ob, u k'aaba' le juula' raayo ekis.
Tuláakal le juulo'ob chíika'antak, je'ex u boonilo'ob le cheelo', yéetel le ma' chíika'antak, je'ex le raayo eekiso', ku meyajo'ob yéetel "raadyasyoon elektromagneetikaj". Ba'ax meentik u jelpajal u chíika'anil wa u xma' chíika'anile' leti' u muuk'o'ob kéen meyajnako'obo'. Raayo eekise' maas yaan u muuk' u juul keet le sáasil suuk in wiliko'ono', mikroonda'ob xane' maas yaan u muuk' u meyaj keet le juul meentik u meyaj le raadyojo'obo'.
Ka jach ojéelta'ab bix u páajtal u yáantaj u muuk'il le juulo'obo' leti' ka jkáaj u meenta'al jejeláas ba'alo'ob je'ex u nu'ukulil cha'an, uti'al u yu'uba'al paax, uti'al u t'a'anal máak wa táanxel tu'ux yanik, bey xan uti'al u kanáanta'al ma' u t'i'it'pajal u yik'lel kaanser ti' u wíinkilal máak xan.