Waats'iaan inali matsona'na ñomndaa tseixmanna' ñe'nquiee nnom na tjachuii' na cwileinein ñomndaa naquii' ts'o̠ndaa Guerrero ndo' ts'o̠ndaa Oaxaca.
Nt'omchen' nn'an cha'na De Jesús García, matsoom na “Nquee nn'an na cwilanein nomndaa, cwiluena na ñeen nnom na tjachuii' na cwileinein ñomndaa, yom nnom cwilenein naquii' ts'o̠ndaa Guerrero ndo' nmeiinna': 1) ñomndaa Suljaa' ndo' 2) ñomndaa Lunjan, na cwileineinna' naquii' ndaatyuaa Suljaa', 3) ñomndaa Ngaan'uum, 4) ñomndaa 'Ndyooquiintsii ndo' 5) ñomndaa Tyotsioom na cwileineinna' naquii' ndaatyuaa Ndyawe ndo' 6) ñomndaa Seichue na cwileineinna' naquii' ndaatyuaa Seichue. Cantyja ts'o̠ndaa Oaxaca, niom we nnom na tjachuii' na cwileinein ñomndaa, ñomndaa na cwileinein Tsjoom Ñman ndo ñomndaa na cwileinein Tsjoomtsjo' catyiu, (2004; 13).
Ts'iaan waa tuiina' ñequio ñomndaa Suljaa', ts'o̠ndaa Guerrero.
Ñequio ts'iaan na cwil'a nquee nn'anngue ñomndaa na m'an ts'o̠ndaa Guerrero, jndaa teijnda̠a̠' na ñomndaa nleiljeiina' ñequio consonante meiin: p, t, c, cw, qu, ', ts, ch, ty, b, s, x, j, nd, ndy, m, n, ñ, l, r, y, w [ng, h]; ndo' ñequio vocales meiin: a, a̠, o, o̠, e, i, u an, a̠n, en, om, o̠n, ein, in, un, um.
Ñomndaa luaa cwii ñ'oom na tseixman toonom, sa̠a̠ hasta na majendyo tyowil'uena' xjen na cwileiljeii, jo' na mati naquii' ts'iaan waa tixocwil'ue joona'.