Nmeiin ndyo jliu nn'an na cwila'naan cantyja ljo' tseiixma tsjo̠'luee na ndmaan ' cancjuu na m'an cañoom'luee cwila'tquio̠o̠'ndyena'na caañoom' ñe'quioom' na matseiixueeñen tsjoomnangue 'maan ya, cjeeti cwila'tyquio̠o̠ndyena' cantyja na jaawiitquia m'annan' yuu m'aan jaa, yochen na matyquiati m'anna', ma cjeeti cwi'oola'tyquioo'ndyenan'.
Cantyja na luaa' cwiwiityquioo' cwiliu nn'an na cwila'naan ñ'oommeiin na teiyoti'chen candyoo'ti ndo' t'uii'ti ñet'om cha'tso cancjuu.
Catseiityiuu' na nnda̠a̠ nntseiitman' ñequio l'o̠' cwii ta na jeen t'man ndo' nntsa' cwii cal'ochjoo juuna', naquii' cal'ochjoo'ñeen mati nntseiitman' ñequioom' ñequio cha'tso cancjuuu, canchje'nan' ñequio we l'o̠' ndo' ñejom ca'ndyii l'o̠' juuna', xjen na nndyii l'o̠' cal'o'ñeen nnan'na'.
Maluaa' s'aanan' nnom tsjo̠'luee, cha'tso ljo' na niom naquii' tsjo̠luee tyonchjena' joonan' cha'cwiijom cwii cal'o ndo' ñejomto jnan' cal'o ñ'een , mana s'aanan' cha'tso ljo' na niom je' nnom tsjoomnangue ndo' cañoom'luee.
Ñ'oomtiuu waa ñequio ñomtsco jndyuna' La gran explosión t'man seinan'nan' naquii' tsjo̠'luee, luaa ñ'oomtiuu na maxcweti na matsona' chuuwaa tuii universo.
Nn'an na cwila'naan ñ'oom meiin cwiqueenna cwenta na chawaa cañoom'luee ñe'cwii xjen winan' ndo' ñe'cwii xjen chom na cwil'anan', jo' na nnda̠a̠ nl'uu na cha'tsondye cancjuu t'uii' ñet'omnan teiyotichen'.