Niom chom 'nacjoo' tsjoomnangue na ta̠nom ts'an xocanda̠a̠ nnd'iaa'nan', sa̠a̠ m'an quioo' na nnda̠a̠ 'nndy'iaayo' 'nan na jaa tyondy'iaa, cha'na catsuu, juuyo' nnda̠a̠ nnd'iaayo' na wi' tjaan' ts'an ndo' candy'i nliuyoo' majndyeti nnom colo na la'xman ljaa' na jaa xocandaandy'iaa.
Ntom' microondas cha na nnda̠a̠ nla'wina' cwii nantyquie cwiwil'uee'ndyena' cwii chom na jndyu microondas na jaa xocanda̠a̠ nnd'iaa, mati ncjo celulares ñequio ncjo radio cwiwiil'uee'ndyena' cwii chom na ta̠nda̠a̠ya xocand'iaa'na'. Naquii' l'aanasei quiwil'ue chom na mati xocandaa ndy'iaayaa, cha'na chom na jndyu rayos X na cwileil'ue na nlui'tsjaan' ndei'.
Cha'tso chom; chom na nnda̠a̠ nnd'iaa, cha'na catsuu ts'oom'nan' ñequio chom na xocanda̠a̠ nnd'iaa cha'na rayos X o chom microondas jla'xmanna' radiación electromagnética (chom na niom nom tsjoomnangue ndo' naquii' tsjo̠'luee). Cwicwii chommeiin xui' cantyja na jnda̠nan', chom rayos X majnda̠tinan' nchiti chom na nnda̠a̠ nnd'iaa' ts'an, chom microondas jnda̠a̠tinan' nchiti chom na cwituee' radio.
Cantyja na jla'no̠n ' nn'an chiuu la'xman cwicwii nnom chom meiin radiación electromagnética (chom na niom nom tsjoomnangue ndo' naquii' tsjo̠'luee)” jnda̠a̠ teil'uee'ndye joona', na nnluii ncjo cha'na televisión, radio, teléfono, ncjo na cwitjeii' tsjaan' ndei', hasta ya nluii nasei cwentaa' tycu cáncer ñequio chommeiin.