Jndye cancjuu na quindy'iaa nnom tsjo̠luee lja'xma cwii sistema solar ndo' chona' planetas na cañoomna'. Mandyo matseijomnan' joona' cha'na ñequioom 'naannya ndo' nnda̠a̠ nnts'aanan' na niom nd'omchen' njoomnangue yuu na niom 'nan na ta'ndo'. Jndye científico queen n'omna na ñe'caliuna cwaan cancjuum'an' chonan' njoomnangue ndo' yuu cwijom nljeii ts'an joonan' nnom tsjo̠luee.
Naquii' chu Agosto 2016 nn'an na cwila'naan cancjuu astrónomos na cwil'a ts'iaan Observatorio Espacial Austral, jla'candyiina cha na caliu nn'an, na jliuna na waa cwiichen tsjoomnangue na matseijomnan' cha'na tsjoomnangue 'naanya (nchii manta̠ juunan' matseijomna chana tsjomnangue 'naanya xeennchi niom nd'omchen'), tsjoomnanguewaa mati mach'eenan' ndei naxen' cwii caxjuu na jndyu “Próxima Centauri”, caxjuu'ñeen cantyoti m'aanna' na cañoom ñequioom' 'naanya.
Jla'cajndyuuna tsjoomnangue'ñeen “Próxima Centauri B”, quia cwila'naanchen na chiuuwaanan' ndo' ljo' tseiixmanan', ndyicwan ticaliuna aa niom 'nan na ta'ndo' jojo', hasta na maje'ndyo cwe'tomti cwiliuna na wina' chana tsjoomnangue 'naanya jo' na cwila'no̠n'na na mandyo nnda̠a̠ nljeii ts'an ndaa jojo'.
Sa̠a̠ mati cwiliuna na ñe'cwii ntyjaa'nan ' mandy'iaa' ñequioom' 'naan na' juuna', jo' na mach'eenan ' na cwii nantyjaa'nan ' chawaa tiampo xuee ndo' cwiichen ' nantyjaa'nan ' chawaa tiampo na jaan , luaa cwii nnom na ticwee'chen ' ya cwentaa' 'nan na ta'ndo'.