Ñ'oomya maⁿ'mo̠n na' 'ñeen jaa, mañenquiaana' na jndo' n'o̠o̠ⁿya ee ñequio juunaⁿ' nnda̠a̠ nla'no̠o̠ⁿ'a tsjoomnague na m'aaⁿya.

Naquii' Ndyuaa Sndaa' jndye njoomngue niom jo' na jndye ñ'oomgue cwiwineiⁿ, luaa cwii nnom na matseiiwentyena' cha'tsondyo. Macanⁿa' na cha'tsondyo̠ cwil'ueendyo̠ ñ'oomya cha'tso joo yuuna m'aaⁿya cha na neinⁿco n'o̠o̠ⁿya nn'co̠o̠ⁿya naquii' njoomya ndo' chawaa Ndyuaa Sndaa'. Naquii' Ndyuaa Sndaa' wanaaⁿ na cha'tso njoom cwil'ueendyena ñ'oomna ndo' ta'ndo'na na ya ñequio nd'omcheⁿ' njoom.

Cantyja na luaawaa, jeeⁿ macanⁿa' na cala'nooⁿ'a nd'omchen ' ñ'oomtiuu na niom nom cha'na ciencia (ñ'oomtiuu na cwil'a nd'omcheⁿ' nn'aⁿ) ñequio física cha na nncwijndo'ti n'o̠o̠ⁿya, jo' na macaⁿna' na cwiljeii ñequio ñ'oomndaa ñ'oom meiiⁿ. Xeeⁿ na luaa nluii nndaa nla'naaⁿ nn'aⁿ ñ'oommeiiⁿ ñequio ñ'oomna. Sa̠a̠ mati macaⁿna' na cala't'maaⁿ'ndyo̠ ndo' cwil'uee'ndyo̠ ñ'oomtiuu na 'ndye welooya, ee joona' ñe'cwiixjeⁿ cajndana' nequio ciencia na cwil'a nd'omcheⁿ' nn'aⁿ.

Tsomwaa, matseiixmaⁿna' cwii ñ'oomtiuu na tjoom' na mach'ee Sociedad Mexicana de Física ñequio Wats'iaaⁿ cwentaa' Ñ'oomngue na cwiwiineiⁿ naquii' Ndyuaa Sndaa (inali).

Tseiixmaⁿna' yom taⁿ' ljeii na cwila'neiⁿ chiuuwaa ndo' ljo' tseiixmaⁿ tsjoomnangue 'naaⁿya naquii' ciencia na jndyu física. Ñ'oomtiuu na xcweti na tseiixmaⁿ tsomwaa jo' na, cwiiljeii ñequio ñomndaa ñ'oomtiuu na tseiixmaⁿ ciencia, ee mati ñequio ñ'oomya nnda̠a̠ nncwiljeii ndo' nnda̠a̠ nla'nooⁿ'añ'oommeiiⁿ.

Ntyjaa' n'o̠o̠ⁿya na nncjaawee' ts'om' tsomwaa ndo' cateijndeiitina' na nntseinoⁿ' chuuwaa tsjoomnangue 'na̠a̠ⁿya. Ñecal'uuyâ njom' na mati 'U nnda̠a̠ nntsa' ciencia, xeeⁿ na nntseiiqueeⁿ ts'om na nntseii'naⁿ'ti' joona' ndo' mancu'ti nntseiiljei' ñ'oomtiuu 'naⁿ' ñequio ñ'oomndaa.