Xó magó mu'wá ìyó lamà rá, ¡ààn nìthíyará' magatháa rínú nè! Numuu rí rìgá mbá'a inii gráxì xó magajaa jùmà noxé' rí nàgii màjmá ló' mu'ne ñajuun rígè'. Ìdé rí phú iwá nàgii màjmaa ñajuun rí magatháa iduu ìyó lamá, gèè màjmaa mìkho àkhá'.
Xí muxí'ñá ló' ìyó lamá àún mbá daan mbàà jamí muruga ra'a ló' nè àún mbá gu'wá rí jambra'a mù gajma xtá (invernadero), ikhí ma'tsí jamí mà'gá rá rí'khú mìnàa iyá (ciclo del agua). Xí phú mikhá rìgaa àkhá' mà'gá ráfíya iyá, ndikhú, iyá rí nifíya nàjne ndú' mìnàà ná xthó nailo jamí ná tsudú gu'wa xtá. À'khué natsuwaa “rù'wa” ná xtó gu'wa; ìyóo rù'wa rígé' màgoo màjmuu xúgii xàbò.
Xó nàguma trá'a jùma rígè' kajngó màjá agájnu ñajuun. Xú'khó manga gijmaa rí mbí'ya xó nàgii mà'ga iýa ná ndá'yo jamí màxájne mismbá iyó lamá. Jùma rígè' mà'ni rí màbáá xkhújndú ná rígá gàjma numuu ìya.