Nakhí wájyú niwa'yàa rí xúgíín a'guáán tsíngua júwé inà ló' ná numbaa jamí xí phú tsinguá júwé iwá nachà ngáñún'. Rí nikújmá rígè' mágò mi'thán rí wajyú nijúwe míjngi ná numbaa. Xí mathángá muyaxé tsúdíí mágò mbu’ya rí xúgíí rí rígà numbaa míjngi kuéje, ru'kho kajngó najumá xó', xúgíí rí niríga mbá nàwàà numbaa ndú' nìguáthú mìnaa'.
Ajúmá' lá' rí mágò mìnaa' mbá júbà asndó agá'ni lajuin xó mbá àkuán', o asndo xó yujndá', jamí ikhí muxu'da lá' àkhá' jamí mbá ikhùún a'guáán, wamba ru'khuè, gònè jáwiin lá'. Ajúma' lá' rí nàmída tìya' xúgíí ìdó nàguánú thíñú. À'kho nigumá numbaa, ná majúwa jamí wàthá mbá' màtríguii.
Rígè' mbí'yú “la Gran Explosión”, ikhá idé rígè' júya nakhú xàbò tsí nùyáxí numbaa àún ciencia. Idó nimidá thíyó' umbaa nikhújmá àgu jamí xúgíí rí ríga nùyáxí ló' xúgé'.
Mbá jùma rí nambáyú ñajun rígè' ñajuun temperatura rí najmá mbí'yáá guátá mbá' mèjno àún numbaa, àgu rí phú iwá wàyu i'yáá ló', ikhá mà ñàjuun idó nuñaxii ló' mikuíí. Ikhá rù'khue rí niríga mbá mi'tsu, mbá nawàà numbaa, niguathú mìnà'.