Si gini'io' yata'a 'ngo nïn hua ni'nij da hue'e chre nadiganj ni'io' si uta má atï'ï yata'a, da'aj nej atï' na hua daj ru'hua gui, masi uta gan' máj dajda ru'huaj si hua lí, a'ngo da'aj má hua lij dój 'nga da' gui, ni a'ngo náj ma hua yachij dój, sani dara'anj guña gurugui'.
Yata'a ni uta ma nej ngá gatse'e' 'nga hiaj, ni 'ngaa nahuin chre'ma 'iaj ma da'nga'daj ro' 'iaj ngá 'ngaa ataj riñan ra'a koj'o ni nahuin ma 'ngo tsin nee. Da'nga' daj 'iaj nej gatse'e 'nga hiaj má yata'a.
'Nga uta nahuin chre'ma uchi' ma nahuin yachij ta'uj, anï nej ngá má anéj doj anï ni' nej sa ma daniïn, daa nari'ij nachrij dugüi'ij nej ngá gatse'e ni hiaj, daniïn nachra ngo gachi' niko xi ni nahuin ña'an ta'u ma, ni hue da 'iaj yigïn 'ngo atï'ïn, yi'i da a'hue ni'io' ma.
Yuman 'ngo diu ni ahui' 'ngo atï'ïn, ni sa 'ia huin si anïn má, anï ya'ni ni'ïnj hua'an nej ngá gatse'e 'nga hiaj, a' uta ga'i nej atï' gima asij ná xi giran' danaj, da'aj nej ngá gatse'e 'nga hiaj giya'ni ni' ni guyumaj da' nada'a dugui'ij ni ginahuin yumi gui néne', hue sa gahui siganij nej atï' na 'nïj ma'an ñu' gui í, si nugui' rayi'i atï'ï 'iaj ni so' ni ñuj se si gane ni'no' da' gachij nu'un' dugui' daj gurugui' nej atï'ï.