Daran' sa ma riña io'oo, daj ro' nee, hiej ni a'ngó sa má, ni huaj daj ru'huaj dadin' nahuin dugui' ga'í xi atomo, 'ngo átomo huin 'ngo sa hua lij doj 'nïj sa má, 'nga nari' dugui' 'ngo si chi' molécula ni ga'hue guchij giriñúj 'ngo nanómetro .
'ngo sa garasun' da' giriñu' átomo ni molécula gu'naj nanómetro, da' garada'nga' ro' daj hua li ni ga'hue ganïn ro' si 'ngo yukuá sani gaa ye'e yu daj ru'hua 'ngo nanómetro, ani guto' gitaj yu yichra 'ngo na'huií, gi'hia riñan yukua naj si daj ru'hua yachíj yumi gui í, daj hua yachij na'hui na riñan yu.
Diu iaj hua 'ngo sa nadigi'ñu nej sa ye'e danaj ni gu'na nanotecnología, huej rasun nej molécula ni átomo, ni rij 'ngo rasuun, nej rasun na ni se si garanga' niña riñu' gini'io' dadin' hua lij ta'u ma, da'hui' garasun aga' gu'naj microscopio da' ginarij ñan du'hua nej rasun na ni nagi'iaj yachíi da' ga'hue gini'io' daj huaj.
Uta ña'an hua nej rasun ri nanotecnología, dadin' uta ga'i ña ga'hue garasun' nej ma, ga'hue garasun' da' gi'iaj gono'o' gui í, a' ri ra nej si digi'ñun daj ga'hue garasun' ma, daj ga'hue gi'iaj sun' 'ngaj, daj ga'hue ginari'ij nej sa yi'í nïj neeku' ni nahuín' gi'hia.
'Ngo yi'i uta a'ui' yi'í gui í huin cáncer, dadin' da'hui' garasun' gono'o yi'í 'nga neeku', hue na 'iaj ni anin rua nej si digi'ñu nanotecnología si ga'hue garasun nej si nej rasun li na da' ma gurin nej sa hua a'na' 'nij neeku' dugahuij, masi akua'ni ni nadigi'ñun nej si daj ga'hue garasun nej si 'nga gui í, yi'i dan rasun akuan' nej si 'nga yutuu.