Da' ga'hue gachrun ñuj nej ñaj na ni nakaj huenda ñuj daj achrun nej sachij digi'ñu nej sin' ni nej silij huaj nej hue' digi'ñun ma nej yuma' a'mi nanj nïn'ïn, hue nej si gachrun ga'i ñaj da' gidigan nej si daj gachrun ni gahia nej silij huaj nga nej sij sinugun', 'ngo ñaj nadigi'ñu asini ñuj gu'naj: Nanj nïn'ïn, lengua triqui Chicahuaxtla, Oaxaca. Primer grado. Sachij gachrun ñanj na gu'naj Fausto Sandoval Cruz, ni ruguñu'uj a'ngo da'aj nej sachij digi'ñu má zona escolar no. 232. A'ngo ñaj nadigi'ñu ñuj gu'naj: Nanj nïn'ïn lengua triqui Chicahuaxtla, Oaxaca. Segundo grado. Ni gachrun sachij Fausto Sandoval Cruz. Ni nadigi'ñu ñuj a'ngo ñanj gu'naj: Nanj nïn'ïn lengua triqui Chicahuaxtla, Oaxaca. Cuarto grado. Ñanj naj gachrun Fausto Sandoval Cruz ni ruguñu'unj Héctor Santiago Santiago, Tereso Andrés Santiago Bautista, ni Domingo Guzmán Sánchez. Daran' nej ñaj na giri hue' nikaj ñu'unj nej hue' digi'ñu má maká ni gu'ná Secretaría de Educación Pública.

Nasinuj ni u'ñut ahiat sa achrun a'ngo nej dugui', huenda ñuj ni nej na mi sa ña'a doj nakaj huendat nga gahiat ñaj na.

Riña nej ñaj gachrun nej sachij na ni, da' nadigan nej si daj nukuaj uni' nane' 'ngá a'mi', ni rasun nej si nej da'nga' na “ ´ ”, “ ` ”, “ _ ”. Riña ñaj gachrun ñuj na ni ma “ ´ ” rasun ñuj.

Rasun nej si 'ngo da'nga' na ('), da' ga'ne' nej si nuguan'a, hua a'ngo nej dugui' rasun (h).

Hua nej dugui' rasun doj (w) da' gacrun sij, dajro' si gacrun si: ni gune' gane ruhua 'ngo hue' nakaj a, danaj gachrun nej si: ni gune' gane ruwa 'ngo we' nakaj a.

A'ngo sa ña'a huin si riña nej ñaj na ni nitaj si rasun ñuj (g) dajro' rasun' nga achrun' nanj stila: ga, gue, gui, go, gu. Hua nej dugui' achrun danaj. Ñúj ni danaj rasun ñúj (g): ga, ge, gi, go, gu.

A'ngo da'aj nej dugui' rasun doj (y) nga da' (i), daj ro' si gacrun nej si: daj ro' 'iaj, ni nej e sij ni achrun nej sij: daj ro' 'yaj.

Iáj ni ña'an huaj nakaj huendo' si ninin doj sinj a'mi da' go'ngo ne' da' dukua ne', nej si nini doj sinj a'mi nej dugui' 'na' a'ngo nej yuma'a, hue rayi'i na 'iaj ni 'iaj chij doj gahio' sa achrun a'ngo nej dugui', sani si hue'é garasun' nej da'nga' taj ñuj na ni sij si u'ñu' doj sinj ahio' sinugun' ni ga'hue garadan'ga' ro' nuj uin si taj nej ñanj achrun nej dugui' ne'.