'Ngo nuguan' a 'iaj nani'ïn' nej dugui', huej 'iaj da' ga'hue garadan'ga' ro' yumi guí ne', huej nadigan daj anïn ro', huej nadigan daj hua man ne'.

'Ngá riki 'ngo yuma'an ma guí a'mi ga'i nuguan'a ni hue'e huaj dadin' 'nga nej nuguan' da unaj nej nuguan' ni'ñaj a, hue 'ngo nej nuguan' ni'ñaj a da'hui' gamichrun' da'ni gina ni gi'iaj sunuj ma riña go'ngo ne' da'ni ne' ruku gi'iaj sunuj ma riña da'hua yuma'a. Nej ne' ma io'o maká ni hua sunuj riña ne' 'nga 'ngo guentu na dadin' uta má ga'i guí a'mi nini nuguan'a, daran' nej guentu na naga'hui' 'ngo sa nukuaj ni dugu'nïj da' gachij maká.

Da' nato' 'ngo sa ani ro' ni da' garadanga' ro' 'ngo sa nata' nej dugui' a'mi a'ngo nuguan' a ni daa huesachre da'hui' gamichrun' guni' ni nakaj huendo' daj anï ruhua go'ngo nej yi'ni' a'mi ni ni nuguan' a'mi' dadin' da' go'ngo nej yi'ni da ni nikaj ni daj anï rua ni nej sa huin riña yumi gui í, danaj ña'a da'huí gáj 'nga nato' nej sa nani'í da'nga' nej guí huaj nej hue' yakan doj, danaj ña'an huaj 'nga ro' nato rayi'i Física.

Hué danaj gáj doj da' ni giranga' 'ngo ñaj 'nïj ra'at, ni gahuí rayi'i nakaj dugui' ga'i nej dugui' a'mi 'ngo nuguan' nini í 'nga 'ngo yi'ni' má maká digi'ñu física ni hue' nikaj ñu'unj nej nuguan' yiñaj má maka.

'Nga nej huatan' yi'ni' sa gachrun ñuj riña nej ñaj na ni anï rua ñuj nata' ñuj 'nga ga'i nuguan' ma maká rayi'i Física, dadïn' 'ngo nani'io' huin gachrun' 'ngo nuguan' a'mi' da' dugu'nïj gá ni'naj ni gachí dój.

Daj ru' nata' ñuj ni uta ga'i gui í ginu huin da' gahui ñaj na, ruhua ñuj si gá nihia' ruhuat 'nga gahiat ma, ni rikij 'ngo sa nukuaj nimat da' ga'hue dugu'ni' gahio' ni gachrun' nej nuguan' a'mi' da' ga'hue nadunane' sa ni'ïn ne' 'nga nej dugui' má riki yuma'a ni 'nga a'ngo nej yuma'a.