Da'aj niïn 'nga ni'ió nej atï' má ga'anj yata'a ni anï ro' sinuj ga'hue ni má saa ni'na'a ga'anj, hué ge yi'í na 'iaj ani rua nej si nadigi'ñú dáj ni dane' ga'hue ginari' nej si.
Riki ahui yi'naá, io' huij min da yinu'ña, 'ngo yi'ni' nej si nadigi'ñu yata'a ginata' si ginari' nej si sí hua 'ngo yumi da'nga' daj ró hua io'oo, ni dugu'naj nej si Próxima Centauri B.
Diu ruku doj ni a' ginari' nej si a'ngo da'aj nej yumi hua da'nga' danaj, sa ni sa huaj huin si ña'an ginahuin guentu na, dadin' atï' nu dani riña próxima centauri b ni huej huin atï' nikïn' nichrun' doj riña gui ni gu'ná Próxima Centauri.
Hua ni' uta hua ga'í sa nadigi'ñu nej si, ni kua'ni si ga'hue gataj io' si má sa hua ni'na a riña yumi Próxima Centauri B, 'ngá nadigi'ñu nej si ma ni rikij ani rua akuan' nej si, si ga'hue ni ma nee riñaj, a'ngó sa rikij ani rua nej si huin si maán anej riñaj diganj riña si gui, daj da anej riñaj hua rumi' daran' diu, ni ané riñaj yigïn daran' diu.