Hua dój sa yigïn 'nga da' sa a'hue ni'iaj runeñu', daj ró yukuaa ni a'hue yigïn ni'iaj yu gachi' ahui neeku', nej yuku yutan ni a'hue ni'iaj yu nej sa hua nihia' nikaj hiaj a, ni da'aj ma nitaj si a'hue ni'iaj ñu' gui í.
'Ngo gaga' duga'ma niaa gu'naj microondas ni rij 'ngo ña'an nitaj si yigïn ni'ió da' duga'ma niaa, ña'an rij gu'naj microondas, hue dáj naj hua gaga' niko' ache' da' ga'mi' nej dugui' nu anej ni rij 'ngo ña'an nitaj si yigïn ni'io', a'ngó gaga' ri nej ña'an na huin radio da' ga'hue duyingaj nuguan'a. Riña dukua gono'ó ni uta niganj rasun nej si a'ngó ña'an nitaj si yigïn ni'io' gu'naj rayos x da' ga'hue narij ñá du'ua kú 'nij ñu'.
Neni' nej ña'an a'hue yigïn ni'io' dajró sa hua nia' nikaj yukua gu'luj, ni nej ña'an nitaj si yigïn ni'io' daj ro' rayos X nej si microondas gu'naj nej ma “radiación electromagnética”. Sa 'iaj hua nini go'ngoj huin daj nukuaj huaj ma. Daj ro' sa gu'naj rayos X nukúaj ma dój 'nga da' ña'an yigïn ni'io' ni ña'an na nukúaj dój 'nga da' ña'an ri microondas, ni ña'an microondas nukúaj ma doj 'nga da' sa 'iaj duyinga' nugua'an radio.
'nga garada' nga' ro' nuj huín si huín radiación electromagnética ni ni'ïn' si huej nadigan daj nukuaj achee 'ngo yi'ni' ña'an a, o' ni hue nej ña'an na nadigi'ñu nej si da' gurui' a'ngó nej gaga' ni'ñaj gui í, daj ro' nej gaga' ni'ió' nej sa 'na' ga'an, asi nej gaga' a'mi' nej dugui' ma anéj, asi daj nani'ïn da'nga' si neeku', nej si daj gi'iaj gono'o si yi'í gu'naj cáncer 'nga nej ña'an na.