Lhuwa nima ukxilhaw stáku' k'akgapun xalanxa par kgalhikgoy akgtum osu akglhuwa katuxawat nima litakgalhchokgotawilakgoy. Naaxalan par makgapitsin uma katuxawat xtachuna' max kinkatuxawatkan chu, ¡anán max latamat!
Par tlaan natatakgsa latamat lakatanu k'katuxawat, luumakgapaxuwanan, wachu xpalakata chalhuwa ti lakgskgalalan karstiano putsanamakgolh lantla chu niku tlaan natatakgsa katuxawat lakatanu kchichini'.
Akxni' papa' agosto xla 2016, wa tiku lekgalhtawakgamakgolh tuku anán k'akgapun skumakgolh k'Observatorio Espacial Austral, makatsininankgolh pi anán akgtum katuxawat nima auyu xtachuna' kinkatuxawatkan, maski niwaku' xlikgasiya, wa uyma tamakatsinin xlakaskinka xpalakata wa uyma katuxawat litakgalhchokgowi xchichini', limapakwikan Próxima Centauri, nima lakatsu taawi kinchichinikan. Wachu lichiwinamakgolhku' wampi tlaan osu nikatila wintu xtamalakgachanalh parchi xalh kaputsanan.
Lhuwaku' wi tuku xlitaputsanat chu ninala aktanks tawan pi anán latamat anta k'katuxawat nima takgskaku' (wanikan Próxima Centauri B), maski tlaan xlikachichi xwa par tlaan x'analh chuchut, wa tiyma xasasti katuxawat ankgalhin lakatuma' lakglakanit xchichini' lata litakgalhchokgowi. Wa uyma wamputun pi xlakgaputu ankgalhi kakuwani, chinchu wa kx'alkgaputu kaaxlipan katsisni'.