Wa kintachuwinkan wan xatikuta kin, maxkiy litliwakga, takakni chu xmakni kinkakilhtamakukan k'katuxawat, nachuna tlaan laalilakgapasaw.

Akgtum pulataman nima kgalhi tipalhuwa xtachuwin liitatlanki xtipalhuwa tachuwin chu xtalakapastakni', xpalakata wa nayma kachikin, tiku tipalhuwa kgalhi lakgtliwakgan xtachuwin, liipawan chu kaknaniy, tlaan mamakxtumiy akgtum tlanka tachuwin tuku nalimatlanki aktanks xtawilat chatum latamaní chu xla putum pulataman. Akgatunu xkachikinin México kgalhiyaw tapaxuwan naliilatamayaw uyma litay tuku tlaan litakgalhchuwinankgoyaw aatanu talakapastakni', xpalakata lismaninitawa' kgaxmataw tipalhuwa tachuwin.

Lakumpi tlaan nalaakgalhakgaxmataw chu nalaa'akgatakgsniyaw anta uynu kxatipalhuwa tachuwin, luu xlakaskinka natatlaway tatsokgni' k'akgatunu tachuwin, liiwaana chu aktanks xlitatlawat uyma taskujut, tlakg liiwakaa laa talichuwinan ciencia, naychu física, talakaskin natamaxtuyacha tatsokgni' nima kaknaniy xtakaxtay tachuwinin, lantla ukxilhkgoy tuku lay k'katuxawat akgatunu kachikinin, chaa wa talakastalaniy wantu wan ciencia.

Naymanchú tatlawalh uyma tatsokgni' nima chipanita' chu tlaan tamakgantaxtilh xpalakata lakxtum skukgolh Sociedad Mexicana de Física, Instituto Nacional de Lenguas Indígenas chu kgamputu laktsuman chu kamanan makgatsokgnanin tiku tlawakgolh uyma tatsokgni' nima tlaan likgalhtawakgapat.

Uyma akgchaxan laktsu tatsokgni' klimalakatsuwiputunaw xtachuwin física kxatipalhuwa tachuwin, kputsamaw lantla natatsuku talaalixakgatliy tipalhuwa takatsin k'akgatunu xkachikinin México, tuku namatliwakglha' xtamaklakaskinat xlitay xtachuwinkan laktsu kachikinin chu namatlanki tipalhuwa tachuwin xalak México.

Uyma aktsu tatsokgni' mamakxtumiy xtaskujutkan chalhuwa latamanin, xlakgati kpuwanaw chu kaamakgpuwantinin pi stlan kalimakgkatsi kimpulatamatkan, lantla tipalhuwa anán tachuwin chu tipalhuwa takatsin nima tlaan laamasiyuniyaw k'akgatunu kachikinin.